Биеийн тамирын сургалтын арга зүй, зөвлөгөө

АМЬСГАЛЫН АРВАН ДАСГАЛ

Дараах амьсгалын дасгалуудаас сонгож биеийн тамирын хичээлд ашиглаарай. Үүнд:

1.            “Лимбэ тоглох”. Сурагчид хөлөө зэрэгцүүлэн, гараар лимбэ барьж буй мэтээр урдаа нугалан зогсоно. Хуруунуудаар лимбэний товчлуурыг ээлжлэн дарах маягийн хөдөлгөөн хийж, “хү! хү! хү!” гэж дуугаран амьсгалаа гаргана. Дасгалыг 15-20 секундын турш гүйцэтгэнэ.

2.            “Өвс хадах”. Хөлдөө мөрний хэмжээний зайтай, гараа бага зэрэг нугалан, хадуурын ишнээс барьж буй мэтээр урдаа өргөж зогсоно. Их биеэр баруун, зүүн тийш эргэхдээ гарын их далайцтай хөдөлгөөнөөр өвс хадах үйлдлийг гүйцэтгэн, “хү! хү! хү!” гэж дуугаран амьсгалаа авч, гаргана. Дасгалыг 6-8 удаа давтана.

3.            “Цагийн зүү”. Гараа унжуулан, хөлдөө бага зайтай зогсоно. Гараа шулуунаар урагш-арагш савахдаа “чаг! чаг! чаг!” гэж дуугаран амьсгалаа авч, гаргана. Дасгалыг 10-12 удаа давтана.

4.            “Түлээ хагалах”. Гараа өргөн толгой дээрээ хуруунуудыг зөрүүлэн барьж, хөлдөө их зайтай зогсоно. Түлээг цохиж буй мэтээр гараа хурдан буулгаж, хөлийн хоорондуур оруулахдаа “х ү ү ү ү ү!” гэж амьсгалаа гаргана. Буцаж бэлтгэх байдалд орохдоо хамраараа урт амьсгал авна. Дасгалыг 6-8 удаа давтана.

5.            “Шумуул барих”. Хөлдөө зайтай зогссон байдлаас цээжний өмнө, нүүрний өмнө, толгой дээрээ алгаа ташихдаа хамраар үлээж амьсгалаа гаргана. Дасгалыг 4-6 удаа давтана.

6.            “Айраг бүлэх”. Айрагны бүлүүр барьж буй мэтээр нэг гараа бага зэрэг нугалж урагш өргөн, хөлдөө зайтай зогсоно. Айргийг бүлэх хөдөлгөөнийг дууриахдаа “хү! хү! хү!” гэж дуугаран амьсгалаа огцом гаргана. Баруун, зүүн гараар тус бүр 6-8 удаа давтана.

7.             “Сэнс”. Гараа алдлан, хөлдөө мөрний хэмжээтэй зогсоно. Гараа саван баруун ба зүүн тал руу эргэхдээ “хүр! хүр! хүр!” гэж дуугаран амьсгалаа гаргана. Нэг талдаа 2-4 удаа эргэнэ.

8.            “Шахалт”. Гараа өвдөг дээрээ тавьж, хөлөө жийн суусан байдлаас бөхийхдөө “хү! хү! хү!” гэж дуугаран аажмаар амьсгалаа гаргана, буцаж эгцрэхдээ “ох! ох! ох!” гэж дуугаран гүн амьсгал авна.

9.            “Цууриа”. Хөлдөө зайтай зогсоно. Эхний хүүхэд нэг амьсгалаар “ээ! хэ! хэ!” гэж чанга дуугаран амьсгалаа гаргаж дуусахад дараагийн хүүхэд үргэлжлүүлнэ.

10.         “Галууны алхаа”. Гараа ташаанд авч, хөлдөө бага зайтай зогсоно. Хүзүүгээ сунган бөхийж, “ш-р! ш-р! ш-р!” гэж дуугаран ойрхон ойрхон гишгэж, зөөлөн алхана. Дасгалыг 4-6 удаа давтана.

Хүйтэн сэрүүний улиралд гадаа талбайд хичээллэх бол гадаа гарангуут хамраараа амьсгал авч амаараа гаргах дасгалыг зориуд хэд хэдэн удаа хийх хэрэгтэй. Ингэснээр гүйх үедээ амаа ангайж, хоолойгоор хүйтэн агаар орохоос сэргийлнэ.